Os promotores desta plataforma cidadá contra a lidia en Noia, Noia Antitaurina, redactamos neste documento os motivos polos cales nos opoñemos á celebración dos festivais taurinos, sexan en Noia ou en calqueira outra parte do mundo.
 

1. Consideramos que torturar a un animal asustado de forma cruel até a súa morte non pode ser considerado ningunha arte. Festexa-la dor, o sufrimento e a explotación dos touros é en todo caso un acto degradante para a nosa especie.

2. Cremos que a tauromaquia é o símbolo vivo dunha sociedade retrógrada.

3. A tauromaquia non é nin arte, nin tradición, nin cultura, nin diversión, tan só un espectáculo macabro e obsoleto.

4. Pensamos que o touro non debe ser un animal predestinado a morrer na praza. Tódolos animais merecemos que se nos recoñezan valores básicos inalienábeis, como son a propia vida e o dereito a vivila dignamente e con integridade. O touro ten un valor obxectivo como individuo, como biotopo ambiental e como patrimonio meioambiental da nosa comunidade; a supervivenza nun entorno natural non debe estar ligado á súa explotación económica e á tortura e morte nunha praza de touros.

5. A tauromaquia non garda ningún tipo de relación coa cultura galega, polo tanto resulta absurdo a celebración dos festivais taurinos en vilas como a nosa.

6. Denunciamos a hipocresía das empresas taurinas que ocultan as torturas ás que son sometidos os touros antes da faena, como golpes nos riles ou nos testículos, para ser vítima no “ruedo” da agresión da garrocha do picador ou das punzantes bandeiriñas. Só despois desta carnicería, o torero, nun alarde de valentía, enfróntase ao animal asustado e gravemente ferido.

7. Manifestámonos en contra de que o sector taurino reciba subvencións, tanto de forma directa como indirecta por parte das comunidades autónomas, concellos, como é o caso de Concello de Noia, e incluso da Unión Europea.

8. Para defender estes ideais, Noia Antitaurina pretende levar adiante campañas de información e concienciación (por medio de carteis e folletos), manifestacións en contra da tauromaquia ou medidas de presión do goberno local, sempre dentro do marco da legalidade.
   Noia Antitaurina conta co apoio da organización non gubernamental Ecoloxistas en Acción.

9. Como colectivo, Noia Antitaurina é unha plataforma apolítica, aínda que os seus integrantes posúan uns ideais definidos.

10. O noso obxectivo final é a erradicación da inxustificada “tradición” taurina que sobrevive na nosa vila.
     

Se ti tamén es un noiés ou noiesa en contra da lidia, apoia a causa de Noia Antitaurina.
Fainos chegar os teus e-mails á dirección de correo electrónico noiaantitaurina@hotmail.com e indicarémosche cómo podes colaborar connosco.
 
En Noia, a 20 de abril de 2005